الجمعة، يوليو 11، 2008

Divorced at Ten

Girl Divorced at Ten
Raped and beaten, Nujood Ali, a child bride, fights for
divorce. CNN's Paula Newton reported.

تعليق على تقريرالـ سي إن إن

الزواج سترة

نجود، طفلة أو كانت طفلة يمنية، عندما زوجها أهلها وعمرها 8 سنوات لرجل عمره 3 أضعاف عمرها. شاب يعني وليس شيخ في الخمسين. والله أهلها ناس طيبين.

طيب دا حتى الجواز بدري يعني حاجة كويسة والأمثلة كثيرة.

مش عارف الناس زعلانة ليه.

جوزها حاول يغتصبها. وأبوها بعد كده بيقول إن جوزها دا مجرم وإنه لم يحترم وعده بألا يلمسها إلا عندما يصبح سنها 20 سنة.

يا سلام.

طيب وليه أبوها يعني يبعتها البعتة دي وهي عندها 8 سنين، ويطمن خالص على بنته إنها تنام في بيت راجل أو شاب باعتبارها مراته مع وقف التنفيذ لمدة 12 سنة. قال إيه دي التقاليد عندهم. أنعم وأكرم.

ماشي.

المهم، نجود طبعاً اتضربت و"جوزها" اغتصبها، فهربت وراحت لأهلها. أهلها طبعاً اتألموا خالص بس قالولها يا بنتي نعمل إيه، إنتي كده طبقاً للشرع مراته.

قامت هربت وراحت للمحكمة، وطلبت من القاضي الطلاق. القاضي طبعاً استغرب وسألها وهو إنتي متجوزة اصلاً؟

اتطلقت بعد ما دفعت تعويض حوالي 200 دولار تعويض "للعريس"، طبقاً للقانون المشتق من "الشريعة".

طبعاً عايشة مفضوحة وسط جيرانها والكل بينظر لها نظرة اتهام ورفض لأنها تجرأت وكشفت المستور.

لأن الجواز بالنسبة لمجتمعاتنا سترة.
سترة مادية: مع الفقر، الأب مش قادر يصرف على اولاده وبناته، الولاد الصغيرين ممكن يشتغلوا، لكن البنات ... شغلهم ممكن يجيب مشاكل.

وسترة اجتماعية: لحسن البنت تحب ولا حد يشوفها ماشية مع واحد ولا حاجة تبقى فضيحة. البنت طبعاً عورة لازم نخبيها بكل الوسائل، قماش، جواز، حبس، المهم نخبيها.

طيب يعني، هو لو واحد مشي مع واحدة، علاقة يعني، ما هما الاتنين يعني مسئولين زي بعض عن العلاقة، ليه الست أو البنت لوحدها تتحمل ذنب العلاقة، لو العلاقات اصلاً ذنب؟

إيه السترة في إن بنت عندها 8 سنين تروح تنام في بيت راجل غريب بغطاء شرعي للجريمة دي اسمه الجواز؟

وتستغرب يقولك أصل دي سنة؟

****
وطبعاً البنت صرحت إنها عمرها ما حتتجوز تاني.

بصراحة: عندها حق.

والله جدعة يا نجود.

بطلة بالفطرة.

وريتيلنا ازاي إن الإنسان جواه طاقة ممكن تقف قدام الظلم حتى لو جاء من الأسرة أو المجتمع كله.

تعليق: وائل نوارة




See the Video Here:
http://edition.cnn.com/video/#/video/world/2008/07/10/newton.yemen.child.bride.cnn

‏ليست هناك تعليقات:

My Page on Facebook

Wael Nawara on Facebook