الاثنين، أغسطس 18، 2008

Feeling Lonely Now?

مشرف استقال

وقبلها كاسترو

يا ترى حاسس بإيه دلوقتي؟






(CNN) -- Pakistani President Pervez Musharraf announced his resignation Monday after weeks of pressure to relinquish power. ....
He was expected to turn in his resignation to parliament Monday. Musharraf quit as the ruling coalition was taking steps to impeach him. Local media reports said he had been granted "safe passage" out of the country.

كل أصدقائك خانوك يا ريتشارد ...

كاسترو استقال ... مشرف استقال ... الأسد مات ... حسين مات ... الحسن مات ... صدام اتعدم ... تشاوشيسكو برده اتعدم ... ما فاضلشي غير القذافي اللي مونسك ...

فاكر سنة 81 لما مسكت الحكم؟
ساعتها حلفت إيمانات مغلظة انك مش حتقعد أكتر من مدتين ... يالله ... يعني هو حد حيفتكر إنت قولت إيه سنة 81، ما نت ياما قولت وقلت وبتقول ... يا راجل ... قول يا باسط ...
وبعدين أكيد إنت كان قصدك نقطتين ... يعني ممكن سنتين ... وممكن عقدين ... وممكن قرنين ... ربنا يديلنا طولة العمر جنبك يا بو علاء ...


فاكر الدنيا كان شكلها إيه سنة 81؟

ياه ... احنا فين وسنة 81 فين ...
كان ريجان رئيس أمريكا ...
وكان تقريباً بريجينيف في السلطة في الاتحاد السوفييتي؟ والله مانا فاكر ... بس أكيد كان فيه دولة اسمها الاتحاد السوفييتي ... دلوقتي اتفكت وبقى فيه روسيا وجورجيا وأوكرانيا ...

يا أخي انت شفت كتير وقليل برده ..

الجنيه في مصر كان يساوي تقريباً دولار ...
وكان سندوتش الفول بحوالي 4 صاغ ... آه ... فاكر العملة اللي كان اسمها قرش صاغ ... وكان القرش صاغ تقريباً واحد على ميه من الجنيه ... عارف الجنيه طبعاً ؟ اللي بيشتري سندوتش فول دلوقتي؟

ياه ... زمن ...

طيب ... يا ترى حاسس بإيه وكل اصحابك مشيوا من الحكم أو ماتوا ...
ممكن تتصاحب على ناس تانيين مثلاً؟ واهم بردوا يسلوك ...
لأ عندك حق ... هيه عيلت ...

طيب ... لو انت استقلت دلوقتي ... حيحصل إيه؟

يا خبر ... ما عندناش أحزاب ... ولا سياسة ولا سياسيين ... ما عندناش ملعب سياسي ... ولا حتى شارع سياسي فيه اجوان معمولة من قوالب الطوب ...

ما عندناش حاجة خالص ...

يعني والحمد لله لو انت اتكلت حتبقى سايب البلد ما فيهاش أي مؤسسة سياسية توحد ربنا ممكن تخلينا نطمئن على انتقال السلطة بصورة سلمية ...

عظيم؟ عظيم إيه يا بو علاء ... دي والعياذ بالله تبقى مصيبة؟ ... نفرض إنك يعني جرالك حاجة ... ؟ ما هو انت برده عندك تمانين سنة وزيادة ... نعمل إيه ان شاء الله؟

فيه ترتيبات؟ طيب ما هي الإشاعات كتير عن الترتيبات دي ...

إيه ما سمعتش الإشاعات؟

أهو ... ناس تقولك جمال ييجي ... وناس تقولك عمر سليمان ييجي ... وناس تقولك أحمد عز راكب ... وناس تقولك مهدي عاكف ...

ألا صحيح ... هو مين اللي جاي؟ سايق عليك سيدك النبي تقوللي؟

برده مش عايز تقول؟
طيب وآخرة الإشاعات دي إيه ؟ أكيد حيكون فيه صراعات ... ما دام ما فيش نظام ولا عملية سياسية ليها إجراءات واضحة، لازم حيكون فيه خناقة ... من ورا الكواليس ... من قدام الكواليس ... أهو ... البلد وحظها ...


يعني باختصار ... البلد مستقبلها على كف عفريت ...
يعجبك الكلام ده؟
دا كلام يرضي ربنا يا راجل؟


طيب حتجاوب الملاك المسئول وتقوله إيه؟
حتفسر ازاي إن بلد فيها خمسة وسبعين مليون بني آدم ... وما فيهاش نظام لتداول السلطة؟


يا نهار اسود ... بتقول إيه؟ ما فكرتش لسه في اليوم ده؟


أمال حتفكر فيه إمتى؟

ليست هناك تعليقات:

My Page on Facebook

Wael Nawara on Facebook