الثلاثاء، أبريل 24، 2012

المدخل الخلفي لهتك عرض جميع الحريات


حبس أي كاتب أو صحفي أو صاحب رأي بسبب رأي قاله أو كتبه هو أكبر كارثة ولا يجب أن نسكت على شيء من هذا القبيل أبدا

ازدراء الدين تهمة فضفاضة ويمكن أن تطبق اليوم على الشيعي وغدا على السلفي وبعد غد على الإخواني-من نكره حديثه ننتقده وقد نقاطعه ولكن لا نسجنه

مواقف عادل إمام بالنسبة للثورة هي مواقف سيئة ومخزية وعلاقته بمبارك ونظامه وأبنائه هي علاقة ترويجية ولا أريد أن أستخدم لفظ أنه كان من هم مع الرصين

واحد بعتلي صورة لعادل إمام وهو مش عارف بيعمل إيه في كوع جمال مبارك

ولكن

هل رفضنا لمواقف عادل إمام تجعلنا نوافق على سجنه بسبب آرائه؟

اللي رأيه ميعجبكش ممكن تخاصمه وما تشتريش كتبه ولا تشوف مسرحياته - وممكن كمان ما تعزموش على عيد ميلادك

على فكرة التليفزيونات الجديدة فيها زرار حلو أوي - ممكن بيه تطفي التليفزيون لو معجبتكش مسرحيات عادل إمام


و فيه تليفزيونات أجدد - تقريبا بيسموها إتش دي - فيها اختراع أحدث عبارة عن جهاز اسمه ريموت كونترول بيمكنك إنك تحول من على القناة اللي مش عاجباك دون أي تحويدات عنيفة أو وصلات كهربائية صاعقة ومعقدة

قوم واحد يقوللي - ده مرة صفوت الشريف قال كده - اللي مش عاجبه القناة يحول بالريموت كونترول - وهو متصور إني أنط وأقول

يا خبر اسود - هو صفوت الشريف قال كده - لأ يبقى الريموت حرام ولازم هو كمان يتسجن


أنا نفسي شفت صفوت الشريف 
مرة بيصلى - إيه - نحرم الصلاة؟ 


أي واحد بيكتب أو بيدون أو يغني أو يمثل - مخرج منتج ريجسير مونتير ما تفرقش - ما ينفعش نسجنه عشان رأي قاله أو مثله - أنا مش بدافع عن عادل إمام كشخص - لكن نحبس حد عشان عمل فيلم معجبناش لأ

عايز تكلمني عن ازدراء الأديان - طيب إيه رأيك في قنوات التكفير اللي شغالة ازدراء في جميع الأديان بما فيها الدين الإسلامي اللي كنا نعرفه؟


شوف هنا بأه - ستوب واقف عندك - أي تهم مطاطية زي ازدراء الأديان دي لازم نقاومها بكل صورة - وش كده

حرية التعبير هي أم الحريات

وأم الثورة دي عمرها ما تنجح لو ابتدينا نفرط في حرية التعبير

والاعتداء على حرية التعبير هو المدخل الخلفي لهتك عرض جميع الحريات - بما إن كل حاجة ماشية جنس اليومين دول

ماشي ؟ وصلت؟

ليست هناك تعليقات:

My Page on Facebook

Wael Nawara on Facebook