أعزائي السيدات والسادة الكرام ..ـ
إحنا مجموعة كبيرة من المستقلين اللي شاركوا في الثورة، اسمنا "تعالوا نكتب دستورنا .
هدفنا نلم أحلام الناس من كل حتة في مصر، علشان نعمل وثيقة شعبية تكون هي الأساس لعمل الدستور الجديد .
وبكده نكون كلنا شاركنا في كتابة الدستور ويبقى بيعبر عنا وعن أحلامنا، وندافع عنه لو احتجنا .
تفتكر نسيب الخبراء والمثقفين والسياسيين يحلمولنا وإحنا نفضل ساكتين ؟ ليه هو إحنا منعرفش نحلم ؟
عشان كده كانت مبادرة "تعالوا نكتب دستورنا"، مبادرة شعبية مستقلة،هي ببساطه جمع الحلم من الشعب، ومناقشته عشان يطلع منه دستور يناسبنا .
وطبعا إحنا بنأكد على إن الانتخابات هى أفضل وسيلة تعبر عن اللي إحنا عايزينه .
لكن الحلم، والتوافق، ووضع الأهداف، حق ومسؤولية الشعب الثائر كله مش بس أعضاء مجلس الشعب المنتخبين واللجنة التأسيسية .
اللي بنتصوره هنا، وببساطة هو إننا نحاول نوجد وثيقة شعبية تعبر عن طموحاتنا وأحلامنا المشتركة، تنور الطريق للجمعية التأسيسسة .
كتابة الدستور مش عملية مقدسة عشان يختص بيها ناس معينين ولا هي عايزة مواصفات في الشخص اللي بيكتبه غير إنه يعبر عن طموحاتنا .
ومحدش هيعرف يعبر عننا أكتر مننا إحنا ، لا فلان ولا علان، إحنا وبس.
وأظن إنك عشان تقول اللي إنت عايزة مش محتاج واسطة ولا لسان غير لسانك يتكلم عن ظروفك وإحتياجاتك .
ومشاركة الناس في كتابة دستورهم هي القوة اللي بتحمي بعد كده من أي حد أو سلطة إنها تخالفه أو تعتدي على ما فيه من حقوق وواجبات .
وإحنا شفنا قد إيه كان دستور 71 مليان مواد تحمي الحريات والحقوق لكن ممنعتش التعذيب، اللي يمنع ده توافق الشعب وكتابته للدستور بإيديه .
مقر المبادرة : مركز هشام مبارك للقانون 1 شارع سوق التوفيقية ـ الإسعاف - الدور الخامس - وسط البلد.
لو عاوز تعرف اكتر عن المبادرة ممكن تزور موقعنا
أوتشوف فيديو بيشرح فكرة المبادرة
وممكن تشوف الورقة التعريفية الخاصة بالمبادرة
وممكن تنضم إلى صفحتنا ع الفيس بوك
صحيح فاتنا كتير وكان ممكن نعمل حاجات كتيرة في الشهور اللي فاتت وأن خطوات الدستور الكتير بقت فى الفترة اللى فاتت سريعة ومتلاحقة، وكان أملنا كبير أننا نوصل لناس كتير ونحقق حلمنا فى أن مئات الألف من المصريين والمصريات يكتبوا الدستور.
وعلشان للاسف لحد دلوقتي الناس محرومة من المشاركة فى عملية الدستور سواء فى مناقشة تصوراتهم عن الدستور أو مشاركتهم فى كتابة الدستور فلسه مبادرتنا ليها أساس وفيها أمل، بس محتاجين نرتب أوراقنا وأولوياتنا فى الفترة القليلة اللى جاية، لان فيه ناس كتير سواء فى مصر أو بره مصر مقتنعه بالمبادرة وبفكرتها وعندهم استعداد أنهم يشتغلوا فى الفترة اللى جاية
او انت مهتم وشايف إنك ليك دور في المبادرة دي .. فيا ريت تحضر معانا اجتماع لتنشيط المبادرة وإطلاقها فى المحافظات وتقسيم المهام يوم الأربعاء 28 مارس 2012 الساعة 6 م بمركز هشام مبارك للقانون (1 ش سوق التوفيقية - الدور الخامس - وسط القاهرة بجوار دار القضاء العالى)
