ناس اليومين دول بتقول إيه ... حرية العقيدة مطلقة ... لكن حرية العبادة مقصورة على أصحاب الأديان السماوية !!!
سماوية عند مين بالضبط ؟؟؟؟
ما هو كل واحد دينه سماوي عنده والموضوع ده شبعنا كلام فيه من 2007 في الفيسبوك وكده
على فكرة معظم المسيحين مثلاً مش معتبرين أن الاسلام ديانة سماوية. يبقى في اوروبا من حقهم يضطهدوا الاسلام؟
يعني لو انت مش معتنق دين من الأديان اللي على مزاج الأغلبية ... (الأديان الإبراهيمية والمسماة ب "السماوية") يبقى مش من حقك تصلي ولا تعبد ربنا!
لكن ...
حرية العبادة مطلقة - "قل يا أيها الكافرون لا أعبد ما تعبدون ولا أنتم عابدون ما أعبد ولا أنا عابد ما عبدتم ولا أنتم عابدون ما أعبد لكم دينكم ولي دين"
القرآن أقر حرية العبادة حتى للأصنام - لأن ربنا هو اللي حيحاسب المشرك ... تيجي سيادتك (أو تأسيسية الدستور) تلغي حرية العبادة؟
حرية العبادة مطلقة إلا في إيذاء الآخرين جسديا - مثلاً واحد يقول ديني بيأمرني بضرب الناس إذا غنوا أو رسموا - وده جزء من العبادات - نقول له دينك على عينا وراسنا - ما عدا موضوع الضرب ده !
ربنا قال
من شاء فليؤمن ومن شاء فاليكفر
لست عليهم بمسيطر
ولا تزكوا أنفسكم هو اعلم بمن اتقي
(إِنَّ الَّذِينَ آمَنُوا وَالَّذِينَ هَادُوا وَالصَّابِئِينَ وَالنَّصَارَى وَالْمَجُوسَ وَالَّذِينَ أَشْرَكُوا إِنَّ اللَّهَ يَفْصِلُ بَيْنَهُمْ يَوْمَ الْقِيَامَةِ إِنَّ اللَّهَ عَلَى كُلِّ شَيْءٍ شَهِيدٌ)
أفأنت تكره الناس حتى يكونوا مؤمنين
@faissl
واضح ان الآية دي بالذات فيه ناس افتكرتها سؤال فجاوبت: آه..!!
@Rababoush تقول
لما بتتعدى على سلطات مديرك في مين يشتغل ومين يشتغلش مديرك بيعاقبك....ازاى بتتجرأ على سلطات ربنا في مين يعبد ومين ما يعبدش؟!
الله وليس الدولة - هو الذي يحاسب الناس على الإيمان والكفر لأنها أشياء قلبية لا يطلع عليها سواه
واحد يقولك ... طيب يعبدوا ربنا بتاعهم من غير ما يروجوا ليه ...
وماذا عن شيوخ الدعوة الذين نبعث بهم لمجتمعات أخرى ليدعوهم إلى الإسلام - ودين المجتمع مختلف عن هذا - ما هو الفرق؟
واحد قالك لازم نقتل اللي بيرتد عن الإسلام
لكن حروب الردة لم تكن حروب دينية بل سياسية - مثل حرب أهلية لرفض سداد الضرائب - وأبوبكر في النهاية بشر وغير معصوم والأهم ... ذلك عصر وزمن آخر
ومع إن
أي شخص يولد على دين آبائه - وإذا قرر فيما بعد مسيحي أن يصبح مسلما أو يهوديا أو بوذيا أو غير ذلك - أو قرر مسلم أن يصبح مسيحيا أو يهوديا أو سيخ أو غير ذلك - فهذا من حقه ويجب أن نحترمه ... تماما كما نريد للمجتمعات الأخرى أن تحترم البوذي أو المسيحي الذي قرر أن يصبح مسلما - بالأمارة نحتفل بكل شخص غير مسلم يصبح مسلما ونعتبره نابغة عصره - مثل جارودي الذي أقمنا الدنيا ولم نقعدها احتفاء به باعتباره مفكرا عالميا والله أعلم بالسرائر ...
واحد تاني يقولك ... لازم نقتل اللي بيترك الإسلام خاصة عندما ينتقد الإسلام مثلاً
ويصر ... لابد أن نعاقبه ... هو يحارب الإسلام ... لكن "الحرب" بمفهومها الذي يبرر الدفاع عن النفس بالقوة ... الحرب بهذا المفهوم هو لفظ محدد ومقصود به استخدام القوة للإيذاء واحتلال أراض الآخرين - أما أن "يحارب" شخص بالفكر والقول فهذا تعبير مجازي - و لا علاقة له بالحرب بمفهومها القانوني الذي يبرر الدفاع عن النفس بالقوة ...
العين بالعين ... يعني لو هناك من يحاربني بالفكر والمقالات ... يمكن أن أكتب مقالات أرد بها وأفند ما يقوله ... "فأحاربه" بسلاحه ... لكن لا أقتله
فالعقوبات المادية تكون ضد عمل مادي - ولا يمكن تصور عقوبة على النضال الفكري أو على رأي أو الدعوة لدين آخر أو حتى انتقاد دين ما
انتقاد دين ما قد لايكون من حسن الكياسة ... لكن عقوبة عدم الكياسة ليست القتل ... بل تكون عقوبة اجتماعية ... مثلاً لا ندعوه لحفلاتنا وممكن نخاصمه ونزعل منه ... لكن لا نقتله ...
مش معقول نطالب الناس تحترم ديننا ونهلل لأن مسيحي اعتنق الإسلام أو لأن المسلمين يتوسعون في بناء المساجد في أمريكا والبلاد الأوروبية والأسيوية ... ونزعل مثلاً من سويسر عشان موضوع المآذن أو المنارات ... ونرجع احنا نمنع غيرنا إنه يبني أماكن عبادة عندنا إلا للأديان اللي تعجبنا ...
احنا بجد برمجية أوي وعاملين فردة على العالم ... عايزين العالم كله يحترمنا ويحترم ديننا وحقنا في العبادة - لكن مش عايزين نحترم حد ... بجد عيب
مثلا
المسلمون في الهند - بلاد السيخ والهندوس - عندهم أعظم مساجد في العالم - هذه هي حرية العبادة - هل لدينا معبد بوذي ؟
يرد واحد ... لأ طبعا لا يمكن نسمح بكده
يعني المسلمين يبنوا مساجد في أي بلد في العالم واحنا لا نسمح غير للي عاجبنا يتعبد؟ احنا برمجية يعني على الناس عشان .... عشان إيه وبأمارة إيه؟
- عشان ديننا هو اللي صح
طيب ما هو كل واحد مؤمن إن دينه هو اللي صح
- آه بس احنا ديننا صح بجد
وهو يعني التاني بيهزر؟ يعني احنا عايزين المسلمين في الهند (اللي أغلبيتها الساحقة هندوس وسيخ) يبقى لهم حق العبادة وإقامة المساجد لكن احنا لا نعامل الآخرين بالمثل؟
هناك 100 مليون مسلم في بلاد الهندوس والسيخ - لو قام عليهم المليار من الهندوس والسيخ مش حيخلوهم - اتقوا الله
حقائق عن الهند: بالهند 300,000 مسجد - أكثر من عدد المساجد في الدول الإسلامية مجتمعة
يقولك طيب تيجي نسأل الشيخ فلان ...
انت عايزني أسأل شيخ "دين ما" إذا كان موافق ويسمح إن أتباع "دين تاني" يعبدوا ربنا بتاعهم ولا لأ؟ إيه المناسبة؟
و لو أستعملنا نفس المنطق ممكن نقول أن سويسرا كان من حقها تمنع المآذن بل و تمنع المساجد ..ما لا ترضاه لنفسك لا ترضاه لغيرك
ما تيجي نتفق على حاجة - عامل الناس كما تحب أن يعاملوك به ... ماشي؟ طيب نسيب الآخر يعبد ربنا بتاعه عندنا عشان هو يسيبنا نعبد ربنا بتاعنا عنده؟
هيه - ماشي؟
مش فكرة بردو؟
************
ختام
بمناسبة حروب الردة ... صديق يقول على تويتر :
لما اراد الروم حصار الدعوه الاسلاميه بعد وفاة الرسول ولعلمهم صعوبة الحرب في الصحراء استنفروا بعض القبائل لخوضها بالنيابه
... ههههههه
يعني القبائل بتوع حروب الردة كانوا أجندات وتمويل أجنبي رومي (من الروم)-وكانوا بياخدوا التمويل ده في صورة قوالب جبنة رومي
التفكير التأمري متغلغل حتي في قراءة التاريخ وتفسيره
2 comments:
دوماً موفقين ... وبأنتظار الجديد ..
دومااا موفقين لكل ما هو قيم
Post a Comment