الجمعة، مارس 04، 2011

لو مش عايز تدفع تمن الحرية سيب غيرك يدفع يا أخي ويعزمك

اللي مالهمش شغلة ولا مشغلة غير انهم يقولولنا قاعدين ليه ما تقوموا تروحوا. - من يوم 25 ولحد النهاردة

يوم الأربع 26 قالولك خلاص الرسالة وصلت ومصر أتغيرت بلاش مظاهرات بقه لحسن أسهمنا في البورصة نزلت

يوم السبت 29 قالولك شفت الفوضى والحرق والحرامية - مع ان اللي حرق وطلع المجرمين من السجون وطلق ميلشيات الترويع كلنا عارفينه - واللي كان بيذيع أخبار ترويع وتخويف مضللة برده عارفينه والاتنين بالمناسبة في السجن بيسلوا بعض النهاردة - خليهم يتسلوا

يوم الأربع 1 فبراير بعد خطاب أنا عايز أموت في مصر قالوا يا ظلمة يا مفتريين - مع ان احنا قولنا ياعم موت في الحتة اللي تعجبك بس لو سمحت سيب مصر تعيش

يوم موقعة البغال والحمير -
قالوا شفتوا الفوضى - مع ان الفوضى اللي كان عاملها ومخطط لها قيادات أمن الدولة والحزب الوطني وبلطجيتهم ولا ننسي وزراء مثل سامح فهمي وقيادات زي إبراهيم كامل والصور موجودة

يوم السبت 5 فبراير قالك حاسب - دا عمر سليمان دا حيجيبلنا الديمقراطية اللي احنا عاوزينها وهرول من هرول عشان يقعد مع عمر سليمان ورجب هلال حميدة ورفعت السعيد - وطلع عمر سليمان نفسه يقول مصر ملهاش في صنف الديمقراطية

يوم الأربع 9 فبراير قالك خلاص بقه لحسن حيحصل انقلاب ونسيوا ان الثورة حصلت خلاص

لحد يوم 11 فبراير - قبل التنحي بنص ساعة - قالك حاسب من الجيش دا حيعلن الأحكام العرفية ويضرب نار على الناس ونسيوا ان الداخلية فعلا ضربت نار على الناس وان 365 واحد ماتوا واكتر من 5000 واحد اتجرحوا - نسيوا ان الجيش دا جيش شريف - جيش مصر - وان مصر تحت طوارئ بقالها 60 سنة

نسيوا ان الحرية ليها تمن

وبعد ما مبارك اتنحى

قالك أنتوا قاعدين ليه - دا شفيق شاطر في المطارات وعنده أحلى بلوفرات

للي مالهمش شغلة ولا مشغلة غير انهم يقولولنا قاعدين ليه ما تقوموا تروحوا. - من يوم 25 ولحد النهاردة

يحسوا على دمهم ويعرفوا ان كل يوم عمود أو كمرة بتتبني في مصر الجديدة

لو هما مش عايزين يدفعوا تمن الحرية

يسيبوا غيرهم يدفع

Sent using BlackBerry® from mobinil

هناك تعليق واحد:

غير معرف يقول...

Kalamak..sa7 gedan we ana ma3ak fe kol 7aga ella eslopak.sorry ghalat enak te2ol MABYFHAMOSH we MALHOMSH FEHA (l2enak meen 3alashan te7kom keda 3alihomY)A3ZEMAK...
Elsa7 nefahimhom 7o2o2hom 2abl manfahimhom engazat thawretna..nefahimhom add eh 2e7na ben7ib masr 2abl ne7kom 3alihom...3alashan ye2afo ganbna msh dedena...wala eeh??
We ba3den ely bey3zim we ebn balad maby2olsh beydfa3 we howa saket we maby2olsh eno dafa3..
3alashan khatry nefakar shoya la2nena mabsoten gedan bely 7asal we elby7sal we 3ayzen masr elgededa terga3 fe shahr isa....we lazim neb2a moktane3en be3oyobna ely kanet fena we kanet mesa3aada elnezzam ely fat..isa kher..we e7na msh han3mil zay kol phar3on mesek 7okm yefred ra2yo we yesta2wa....we akher kalamy الساكت عن الحق شيطان أخرس.فهل إذاتكلم أصبح ملاكا ؟وهل من حقه أن يتكلم الآن ويصبح برئ و نحترمه. بالطبع لا فمن منع من شيء 30 عاما كان من عاداته و صفاته .و أذا كانت الظروف لم تسمح له بالحديث و التغير ، و ذهبت. فليتريث حتى لا يسقط من الأنظار و يفهمه العقلاء انه بلا مبدأ و لا هدف غير البوح بالكبت و الأسرار . إذا كنت من الساكتين 30 عاما قم بجمع أفكارك و مرن لسانك على الكلام و كن قليل الكلام و بعد فترة ثرثر كما تريد.

My Page on Facebook

Wael Nawara on Facebook