مسلمين ومسيحيين مصريين وثايرين

الثورة دي ثورة تلقائية لكل المصريين - مسلمين ومسيحيين وغيرهم - لا فيه حزب يدعي إنه نظمها - ولا جماعة تقدر تقول إن ناسها نجحتها - الناس كلها شاركت - فيه ناس شاركت أكتر من غيرها - لكن ناس كتير أوي أوي شاركت  - ثورة على المشاع يعني


يا ريت محدش يحاول بحسن نية يحول الثورة عن مسارها المصري الشعبي لأي مسار تاني .... الشباب نفسه واعي لده ...

مثلاً واحد شيخ ملتح في مظاهرة التحرير تسلق الأكتاف وبدأ يرفع المصحف ويقول لا إله إلا الله حسني مبارك عدو الله - البسطاء نزلوه بلطف وقالوله دي مظاهرة سياسية يا حاج

بعد شوية ركبوا ميكروفون إذاعة التغيير من ميدان التحرير وبدأ واحد يتكلم زي ما يكون بيعمل خطبة دينية - برده الناس رجعوه لخط السياسة ومصر الواحدة اللي ما تعرفش فرق بين مسلم ومسيحي 

وفي نفس الوقت المسلمين والمسيحيين هتفوا معا الله أكبر بتلقائية لأن الله أكبر من الظلم والطغيان والمدرعات وقنابل الغاز في كل الأديان

وقت الأذان والصلاة الناس مسلمين ومسيحيين بطلت هتافات وفيه ناس صلت مع بعضها وسط المظاهرة

الناس كانوا من كل الأشكال - شريحة معبرة عن تنوع الشعب المصري ووسطيته وقبوله الآخر بصورة تلقائية لا تحتاج لتنظير ولا خطب - الغالبية كانوا طلبة جامعة وشباب خريجين كله طبقة وسطى لابسين عادي - البنات فيه المحجبة وفيه اللي لابسة جينز وفيه اللي لابسة ثوب طويل وفيه اللي لابسه لو ويست - لكن ما سمعناش عن واحد اتحرش ببنت ولا حتى اتساخف عليها بكلمة - البنات قبل الولاد فضلوا يهتفوا واحنا ماشيين في الشوارع لحد الفجر 

الناس عملوا لجنة إعاشة ومشيوا بكيس بلاستيك يلموا فلوس من المتظاهرين - كل واحد طلع اللي فيه القسمة - اللي دفع خمسة جنيه واللي دفع عشرين واللي دفع مية ... لموا حوالي واحد وعشرين ألف جنيه جابوا بيها أكل وبطاطين - طبعا البطاطين ما كفتش - ناس زي أيمن وحسام راحوا اشتروا بطاطين على حسابهم - بردو ما كفتش -  الولاد كانوا بيدوا البطاطين لبنات ما يعرفوهاش

واحد جه بفسبا عليها اكياس عيش شامي - واحد من المتظاهرين اشترى منه كل العيش - حوالي 500 رغيف ومشي يوزعهم على المتظاهرين ويتأسفلهم إنه عيش حاف - بس كان أحلى عيش - عيش متغمس بطعم الحرية

 #Jan25 #Jan28