الأربعاء، يناير 26، 2011

النظام الواثق من نفسه يحجب التويتر ويوقع شبكات المحمول The Regime Blocks Twitter and Suspends Mobile Service


النظام اللي بيقولك دول اربعين ألف لا يعبرون عن 80 مليون أقوله

أولاً دول ما كانوش 40 ألف - مش حقولك عد كويس - لأنك معروف بالتزوير - الـ 19 صوت فرط عندك يتقلبوا بقدرة قادر 119 ألف صوت 

انت طول عمرك ضلالي وتاكل مال النبي وتحلي بالصحابة

مظاهرة التحرير وحدها في وقت من الأوقات كان فيه بحر من البشر يصل إلى 3 أو 4 استاد كورة يوم الأهلي والزمالك واسأل الصور يا مفتح

يعني 200-300 ألف يا ابو الفقها

وفي كل مدينة مصرية - المحلة - السويس - اسكندرية الباسلة - وغيرها وغيرها - عشرات الآلاف من خيرة شباب ورجال ونساء وأطفال مصر نزلوا يقولوا لأ

يعني ما يقرب من مليون مصري نزلوا يقولوا لأ

مليون مصري حطوا صدرهم قدام المدرعات وقنابل الغاز والرصاص يا جبان

ولا انت حتكذب الكذبة وتصدقها

وبعدين لما انت برم كدا والناس بتحبك 

فين هما الناس دول اللي بيموتوا في دباديبك 

إياك تكون فاكر اللي اشتروا 750 ألف تكييف كانوا حيعملوا مظاهرة يشكروك

لما انت برم كدا -  وواثق من نفسك ومن حب الناس ليك - أمال قفلت التويتر ليه؟

وقعت شبكات المحمول ليه؟


أما الداخلية اللي بيستفردوا بالمتظاهرين ورا المسيرات - شجعان أوي أوي - بس خدوا بالكم - التاريخ بيسجل

لما كان بيقع عسكري أمن مركزي غلبان - كنا بنحجز عليه ونشيله قبل ما تدهسوا الرجلين

لكن دي أخلاق الفرسان - أخلاق الشباب المصري

أما الجبنا

فأخلاقهم خلاف


أنا بقولك

اللي بيضرب أهله وناسه

يبقى جبان من ساسه لراسه

وشبكة المحمول مش هي الشبكة الوحيدة اللي حتقع في مصر


دا فال حلو إن شبكة الفساد كمان حتقع

وحيقع معاها النظام


أسأل نفسك - لو وقعت شبكة الفساد - لو العالم الحرامية اللي ماشيين في ديلك عشان الأراضي والنهب العام - بطلوا ياخدوا تراخيص للنهب العام - تفتكر كام واحد حيفضل ماشي معاك؟

عد كدا؟

ولا واحد


يوم ما شبكة الفساد حتقع

حيقع معاها النظام




ليست هناك تعليقات:

My Page on Facebook

Wael Nawara on Facebook