الخميس، نوفمبر 24، 2011

محاولة لقراءة ضمير الميدان - جبهة القوى الثورية


الزملاء الأعزاء،

برجاء النشر بكل الطرق الممكنة لهذه الأسئلة والإجابات فى محاولة لدعم الاعتصام وفضح الكذب عن الميدان – أيضاً برجاء إرسال أى ملاحظات

 

http://www.almasryalhurr.org/SCAF_Sit-In_Answers.htm

 

إجابات الميدان
(اعتصام تنحى المجلس العسكرى عن إدارة البلاد)

 

س: مين اللى موجودين فى الميدان

ج: أشرف شباب مصر من جميع الطبقات والألوان والأديان – مستقلين وحركات سياسية وأحزاب، حتى الأحزاب والجماعات الغير مشاركة رسمياً موجود منهم أعضاء كتير. الكل اتفق على عدم رفع شعارات حزبية أو حركية، وعدم وضع أى منصات، الشعب موحد أفراداً وثواراً. كمان ناس كتير جداً مش قادرة تنزل لكن بتدعم الميدان بالأدوية والبطاطين عشان المصابين فى كل المستشفيات الميدانية.

 

س: ليه بيهجموا على الداخلية وعايزين يقتحموها؟ ليه مش بيقعدوا فى الميدان؟

ج: بعد العنف الشديد من الشرطة تجاه اعتصام حوالى 70 من مصابى الثورة (مش قافلين الميدان ولا قاطعين طريق) كانوا بيطالبوا بس إن المجلس يحن عليهم ويعالجهم، الشباب نزل يحميهم وينقلهم للمستشفيات، ومن يوم السبت تعرض الميدان أربع مرات لاقتحام – تلاته منهم من الداخلية ومرة من الشرطة العسكرية – وكلنا شوفنا القتل والضرب والسحل على التليفزيون. الشباب بيقوموا بواجبهم فى الدفاع عن النفس مش أكتر، وكل ما تحصل هدنة يكسرها عناصر الشرطة يشهادة الشهود وكمان ساعات والناس بتصلى بيضربوا عليهم غاز. كتر الغاز والخرطوش وغزارة الدم بتبقى على الاستنفار بين الشباب والرغبة فى الضغط.

 

س: هم اللى فى الميدان عايزين إيه بالضبط؟ هل عندهم حل أو رؤية لحل؟

ج: الناس بعد فشل المجلس العسكرى لإدارة البلاد والانفلات الأمنى وبعد ما المجلس قتل الناس فى الميدان مصرين على إن المجلس يتنحى عن إدارة البلاد فوراً ويسلم صلاحياته لحكومة إنقاذ وطنى كاملة الصلاحيات والسلطات التشريعية والتنفيذية – ويبقى المجلس على رأس الجيش ضامناً لانتقال السلطة لرئيس ومجلس شعب منتخبين وليس حاكماً أو مديراً للبلاد، ودى المبادرة اللى اتكلم عنها الدكتور عبد المنعم أبو الفتوح والدكتور محمد البرادعى – وفى ناس فى الميدان بتقول يسلمها لمجلس رئاسى مدنى، فى الحالتين اللى هيستلم هيكون سياسيين ليهم خبرة فى إدارة البلاد مش عسكريين كل خبرتهم إدارة جيش.

 

س: طيب اشمعنى يعنى البرادعى وأبو الفتوح؟

ج: أولاً الإثنين لديهم القدرة والنزاهة والتجربة القيادية والخبرة السياسية والأهم إنهم لن يقبلوا إنهم يكونوا سكرتارية للمجلس.

   ثانياً: الإثنين من أهم دعاة مدنية الدولة فى التيارين اليبرالى والإسلامى وهما كمان بيضمنوا تمثيل التيارين الأهم فى مصر الليبرالى والدينى.

   ثالثاً: الاتنين كمان بينادوا بوحدة الصف وأقل من أثار الاستقطاب والفتنة، وده اللى مصر فعلاً محتاجاه دلوقتى.

 

س: طب ما الانتخابات كانت هتوصلنا للديموقراطية الحقيقية، ليه الناس ماتستناش؟

ج: والانتخابات التى تفرزها قوانين ضعيفة ووضع أمنى مهترئ وتحت إذارة المجلس العسكرى واستقطاب بين القوى ستأتى بمجلس متفرق وضعيف وملبئ بالفلول وخاضع تماماً للمجلس العسكرى والذى سيعيد انتاج النظام القديم، أيضاً المجلس العسكرى أصلاً رفض أن يشكل مجلس الشعب الحكومة الجديدة وبالتالى تشكيل الحكومة ونقل صلاحيات المجلس ليس له علاقة بالانتخابات لأن المجلس رافض.

 

س: هم اللى فر الميدان مش عايزين ديموقراطية، دول عايزين اللى هم عايزينه وبس!!!

ج: ده مش صحيح الأغلبية الساحقة فى الميدان كل اللى عايزاه هو الحرية والديموقراطية والأهم وقف القمع العسكرى الديكتاتورى للشعب واستباحته للدماء المصرية ومطالبهم هى حقوق الإنسان الأساسية من كرامة وحرية وعدالة إجتماعية، مفيش ديموقراطية تحت قمع عسكرى وبدون حرية، الناس مش مهتمه بالانتخابات ولا وثيقة السلمى، الناس بتدور على كرامتها وحريتها ومش قادرة تسيب دم شهداءها على إيد مبارك وعلى إيد مجلسه.

 

س: طيب والناس دى بقى اللى عايزه تشيل الجيش هتقدر تشيل البلد لو المجلس مشى؟

ج: نحن ندعو لبقاء الجيش بل ندعم بقاء الجيش المصرى داعماً للاستقرار والأمن وده واجبه، الهدف هو إقصاء المجلس العسكرى عن إدارة البلاد السياسية اللى هو معندوش خبرة فيها ويركز فى الأمن اللى هو فى الأساس واجبه الرئيسى، مش هدفنا أبداً إقصاء الجيش الذى هو جزء أصيل من الشعب المصرى.

 

وفى الآخر إسأل نفسك:

بعد 9 شهور من تخبط وإنعدام أمن وسوء إدارة والبلد على وشك تدخل فى أزمة اقتصادية، لسه عايز المجلس اللى معندوش أى خبرة فى الإدارة يمسك البلد كمان 7 شهور؟

بعد كل الأخطاء والدماء المصرية اللى سالت على إيد المجلس العسكرى، لسه عايز المجلس يخطئ أكتر ودماء مصرية تسيل أكتر؟

لسة عايز عنف الداخلية مع المتظاهرين وتسيبها وتساهلها مع البلطجية وإهمالها فى حفظ الأمن؟

أنا عايز حكومة إنقاذ سياسية عندها القدرة والخبرة لإدارة مصر والإرادة إنها تنفذ مهماتها الأساسية الأمن والاقتصاد والعدالة الاجتماعية، حكومة تقدر تنقلنا للديموقراطية الحقيقية – كفاية ضيعنا 9 شهور.

 



ليست هناك تعليقات:

My Page on Facebook

Wael Nawara on Facebook